قصه حمزه

اجبر قلبي وارزقني عوضا يرضيك ويرضي قلبي.
برضو مش مثبت كويس يا حازم! بجد زعلتني منك.
بص للأرض بضيق من نفسه وأنا شاورتله على جنب بعيد يقعد فيه عشان يراجع تاني وأنا بحول اهتمامي لدينا بنت أخويا عشان تسمع اللي عليها عقبال ما الأستاذ حازم يخلص.
علينا إيه النهاردة
ابتسمت جامد
علينا سورة الفيل.
ضحكت على حماسها اللذيذ وبعد ما سمت الله بدإت تسمع وأنا دماغي سرحت بعيد في سنتين عدوا زي الهوا لكن حصل فيهم كتير.
ابتسمت وأنا ببص للصالة حواليا واللي كانت شبه مليانة بالأطفال وكل واحد فيهم واخد جنب وبيقرأ اللي عليه بتركيز وعيني بتلقائية وقعت على شهادة الإجازة المتعلقة قصادي واللي خدتها قريب بعد ما تميت حفظ القرآن كامل بقراءة حفص عن عاصم.

فوقت على هزة خفيفة من دينا لما خلصت وبابتسامة ضميتها وأنا ببوس راسها بفخر قبل ما نبدأ نقرأ مع بعض السورة الجديدة اللي عليها.
شوية وسيف دخل علينا بابتسامة فقومت قربت منه وأنا بضمھ بامتنان بحب أعبر عنه من وقت للتاني.. أصل أخ عظيم زي سيف ميستحقش غير الحب بجد.
باس راسي وهو بيضمي بأريحية وبعد ما اتطمن على دينا ودقايق وسابنا ودخل أوضته لأسماء اللي بتبقى قاعدة في الوقت دا في أوضتها تراجع اللي عليها أو في المطبخ بتحضر الغدا وأنا بحب رجعت أركز مع الأطفال.
أنا حفظت كويس يا معلمة أمينة.
ابتسمت لاسمي اللي بيطلع من بوقه الصغنون زي السكر وبلين خدت منه المصحف وأنا بشاورله يقعد جنبي عشان يبدأ تسميع سمع آيتين بالظبط وبعدين وقف والمرادي انتبهتله وأنا بقول باهتمام
عارف يا حازم إحنا بنحفظ قرآن ليه!
عشان دا كلام ربنا وعشان ربنا يحبني أكتر.. وعشان يوم القيامة ألبس ماما وبابا تاج وأكون من حفظة القرآن اللي ربنا بيحبهم كتير.
طبطبت على شعره بحب وأنا بقوله بابتسامة
طب أقولك على معلومة جديدة
هز راسه بحماس فاتكلمت
عارف! يوم القيامة اللي حافظ القرآن دا بييجي قدام ربنا وربنا بيقوله اقرأ اللي انت حافظه زي ما كنت بتقرأ في الدنيا فاللي بيكون حافظ كويس بيترفع بكل آية درجة في الجنة لحد ما يوصل لأعلى درجة باللي هو حافظه.
قشعرت كعادتي وأنا بتكلم وبستحضر في ذهني المشهد المهيب دا وهو شوية ورد بصوت متوتر
بس كدا أنا..
قاطعته وأنا بطبطب على كفه
انت هتحفظ كويس المرة الجاية وبإذن الله مش هتغلط ولا غلطة.. صح
هز راسه بلهفة وهو بياخد مصحفه وكراسته بعد ما كتبتله اللي عليه وبيمشي وأنا بابتسامة قعدت أراقب باقي الأطفال بحب.
جه في بالي فجأة حديث الرسول ﷺ خيركم من تعلم القرآن وعلمه وابتسمت وأنا بفتكر إزاي قدرت أفوق نفسي من دوامة حزن كادت تسيطر عليا بقرار مفاجئ أخدته بإني أحفظ القرآن وبقرار أكبر بعد ما أتميت حفظه وهو إني أبدأ تحفيظ بعد أطفال الجيران القرآن وبجد أنا مشوفتش أحلى من الموڤ أون دا في حياتي.. سبحان من ألهمني هذا الفكر وصرف عن قلبي كل تعلقي القديم بحمزة بجد.
بالنسبالي ألذ في ما في الموضوع هو إني بقيت أغلب الوقت قاعدة وسط الأطفال بروحهم الشفافة وبرائتهم اللذيذة لكن رغم إني بعتبرهم أطفالي إلا إني بتمنى كل يوم وكل ليلة لو ربنا يرزقني بالزوج الصالح والذرية الصالحة اللي تجبر قلبي بزيادة.. اللهم آمين.
بارك الله لكما وبارك عليكما وجمع بينكما في خير.
ضحكت بحب وأنا بسمع المأذون بيردد جملته الشهيرة بصوت عالي ومن بعدها قلبي دق بتأثر لما حسن شد ندى لحضنه ولف بيها جامد.. ضحكت زي الهبلة